عذرا رسولى الحبيب

الاثنين، ٥ مايو ٢٠٠٨

الحب فى الله




بسم الله الرحمن الرحيم

انا مش عارفه ابتدى منين


واقول ايه


حاسه انى لأول مره بكتب فى دنيتى الجميله


ومش مجمعه اى حاجه


بس نفسى اتكلم شويه معاكم


حاجات كتيره حصلت الفتره اللى فاتت لخبطتنى


وعملتلى حب استرجاع لترتيب حياتى من جديد


بس قبل ما اكلمك على كده بحب اشكر كل اللى علقوا على البوست اللى فات


وانا مقدرتش ارد عليهم بس فعلا مش بأرادتى


لكن فى بعض التعليقات اللى لازم اتكلم عنها:


اولا : مى صاحبه أحلى 21 دسته افكار


مى فعلا انا بعتذرلك على تاجك الجميل ممكن نأجله شويه


ثانيا: نورى حبيبتى ورومنسيتها بالمايونيز


شكرا يا نورى على اهتمامك بيا وتعليقك اللى هون عليا


وانك تكتبى بوست مخصوص على حالتى


وشده فرحى لما وجدته مكتوب فى تعليقات اصحابك من دعوات


فعلا حسيت بسعاده انك سبب لوصول دعوات ليها فى قبرها من ناس مش عارفينها


ثالتا: الاستاذ صالح سعيد


معلش اعذرنى تعليقك كان فيه شىءعايزه ارد عليه بس ممكن ببوست قريبا ان شاء الله


بيحكى عن صداقات التليفون لو يعنى سمحت لى


وطبعا الشكر لكل التعليقات اللى جتنى من اخواتى المدونات ربنا يحفظهم


نرجع بقى للى حصلى


يا جماعه ان لله وانا اليه راجعون فى خالتى الحبيبه


مش كده وبس لا


دخلت عند مدونه والقادم..... اجمل


ومن ضمن الاشياء التى هزتنى وجود من ضمن المدونات الصديقه لها



شيماء رحمها الله يا ريت تدخلوا عندها وتقرولها اخر بوست وتقرأوا التعليقات كلها


شىء مؤثر جدا واحده كانت كده زينا بتكتب وليها مدونتها اللى بتحبها وهى فين دلوقتى


فى دار الحق ادعوا الله لها بالمغفره والجنه


ذهبت شيماء وماذا تركت ؟


تركت مدونه تدل على شخصيتها فعلا انا للأمانه لم اقرأ لها بوستات غير هذا البوست الاخير


ولكن احب ان اوضح انا رحلت وتركت مدونه وهذا ما سيحدث لنا


بعد طول واو قصر عمر فكلنا مردنا اللى هذا الحال


فعلا يا جماعه عايزين واقفه مع النفس


انا بقول كده وعارفه انى ممكن اكون اكتر واحده مقصره فى عباداتى


ولكنى نفسى اعيد ترتيب حياتى من جديد


قبل ما يحدث هذا لخالتى دائما كنت قبل النوم على سريرى اقول لنفسى


نفسى اعمل استوب لحياتى وابدأها من جديد


وهذا كل يوم ولا يحدث لى جديد


وحتى الان


نفسى ولكنى مش عارفه حاسه انى مشتته


ابدأ من فين


اعمل ايه


بحاول وزوجى قالى ابدئى واحده واحده قليل دائم خير من كثير متقطع


فعلا لازم نفوق ونصحى شويه ويا ريت نترك من بعدنا مدونات نظيفه تكون فى ميزان حسناتنا


هحاول وانتم حاولوا معايا ويمكن مع بعض نقدر نعين بعض على طاعه الله


يعنى اللى يقدر يفيدنا يقول لنا على الخط المستقيم اللى نقدر نمشى عليه ونوصل بدون وقفات


انتم فاهمنى اصلى فعلا مش عارفه انا بكتب ايه ويا ترى حد فاهمنى ولا لأ

ملحوظه: اوصيكم بسماع انشوده ليس الغريب لمشارى العفاسى
هى رائعه ومفيده وكلها عبر

هناك ١٦ تعليقًا:

صاحب المضيفة يقول...

غفر الله لخالتك ولشيماء ولجميع موتى المسلمين وغفر لنا جميعا

كلنا نتمنى ايقاف حياتنا وبدأها من جديد

لكن لا يمكن فذاك من المستحل ويكفينا من ذلك التوبة النصح حينا بعد حين


تحياتي ودعواتي

و القادم....أجمل يقول...

السلام عليكم
بصي موضوعك مؤثر اوي
و أكيد كل واحد بيفكر و لو
لدقايق فيه
هي البداية بس و الثبات عليها

دعوااااتك
و معلش اعذريني على كلامي القليل

ربنا يجازيكي خير

walaa يقول...

انا فهماكى يا ستى عايزه ترقبى اكتر من ربنا علشان العمر مش مضمون
عندك حق عمر الانسان محسوب عليه
ان كان خير سوف يحاسب عليه وان كان شر بنقلب ضده علشان كده لازم نقرب من ربنا ونيديله اللى هينفعنا مفى الدنيا والاخره
وهى مثلا لا تكون عبادات وفقط
يعنى مثلا لحديث لرسول الله فيما معناه
اقربكم منى مجلسا يوم القيامه احسنكم اخلاقا
والدين المعامله
اما بقه العباده فانت تحديها على حسب مقدرتك عليها
وكما قال لك زوجك
الاقصر والادم خير من كثير متفرق
تحيات ى ليكى
بس انت بتغيبى علينا كده ليه بتوحشينا والله
تحياتى ولاء

همسات دافئه يقول...

الله يرحمهم:(
دخلت بلوج شيماء بعد مااتوفت انا كمان واتأثرت جدا برحيلها رغم انى مكنتش عارفاها قبل كده
فعلا احنالازم نسيب حاجه نظيفه تنفعنا بعد ما نرحل
موضوعك جميل وهزنى فعلا ربنا يعننا جميعاَ
جزيت خيرا
شيماء

رحــــيـل يقول...

اولا
حمد الل على السلامه رجوعك عالم التدوين

ثانيا
البقاء والدوام لله ان لله وان اليه راجعون

ثالثا
بقى انا عايزه اقولك انى بجد حاسه قوى كل كلمه انتى كاتبها وبمر بنفس الحاله حاسه انى واقعه جدا جدا
وكل يوم اقول هبدا من جديد

انا اول لما دخلت التدوين قريت مدونه شيماء وفعلا وقت عندها كتير وعند التعليقات بتاعتها
واتأثرت بيها جدا
محدش عارف بكره هنكون فين
ربنا يرحمها ويكرم مثواها هو وكل اموات المسلمين

قصيده ليس الغريب رائعه فعلا انا بحبها قوى

ربنا يهديكى للى فى الخير ويثبت قلبك يارب
تحياتى وحبى لكى

jejemam55@gmail.co يقول...

مدونه جميله انا كنت تايهه عنها فين ؟؟؟؟

صحيح حضرتك من بنى سويف زى ما فى البروفيل
لو مظبوط نتمنى تشرفينا فى شخابيطنا السويفيه
http://shkhbat.blogspot.com/
للاستفسار
om_eyad06@yahoo.com

دنيتى الجميله يقول...

صاحب المضيفه
اللهم امين
ربنا يتقبل من حضرتك

اكيد طبعا من المستحيل ايقاف حياتنا
بس حتى نحاول تنظيمها شويه
ربنا يرزقنا التوبه والاخلاص ومن ينصحنا ويكون لنا عون فى الهدايه والثبات

دنيتى الجميله يقول...

والقادم اجمل
وعليكم السلام ورحمه الله وبركاته
كلامك مش قليل ولا حاجه
كلامك صحيح ومؤثر جدا
انا كنت عايزه فعلا اقدر اوصل للبدايه والاصعب هو فعلا الثبات وده عايز عون من ربنا كبير
دعواتك
ونورتينى فى دنيتى

دنيتى الجميله يقول...

Walaa
والله انتى اللى بتوحشينى يا ولاء
كلامك جميل وحساه من اخت حنينه وطيبه
عارفه موضوع خالتى خلانى ادقق فى اشياء كتيره
خالتى توفت وهى صغيره السن ولها اطفال صغاروكانت اقرب الناس لى
فسألت نفسى هو انا مين اللى ممكن يسمعنى تانى واشكو لهو كل شىء ويعطينى خبرته وحبه ويسهل لى الدنيا ويسعدنى
وشعرت ان مهما طال بى العمر فكأنما هى ايام معدوده فقط
فلازم احسب لكل شىء
وطبعا بحاول بس مين يا ماما هو برضوا هيسبنى
عارفه حسيت انى بجاهد مع نفسى
واذنب واتوب واستغفر وارجع تانى
بس اكيد نفسى حياتى تتغير للأحسن
طولت عليكى
مش كده

دنيتى الجميله يقول...

همسات دافئه
اهلا بيكى منوره دنيتى الجميله
حقيقى
انا سعيده ان موضوعى وصلكم بالشكل ده
اصلى كنت حاسه
مش عارفه
بس يا رب فعلا يكون سبب لتغير كتير من حياتناويجعله فى ميزان حسناتنا
دايما كنت بسمع موبايلك يدل على شخصيتك
وخليه عنوان ليك لو حد مسكه يعرف منه اسلوب حياتك
طبعا للى بيحطوا حاجات غريبه على موبايلتهم
ودلوقتى حسيت ان مدونتنا لازم تكون كده
ويسلام لو تكون فى ميزان حسناتنا
نورينى دايما يا شيماء

دنيتى الجميله يقول...

ra7eel
اولا الله يسلمك ويحفظك
ثانيا
البقاء لله وحده
ثالثا
عارفه انا حاسه والله اعلم ان شيماء كانت بنت كويسه ومقبوله ان شاء الله
حتى يكون موتها فيه عبره لكتير مننا
ربنا يتوب عليها ويغفر لها ويجعل قبرها روضه من رياض الجنه
تخيلى اننا ممكن بعد موتنا نلاقى حد بيدعلنا ومكناش عارفينه ولا هو يعرفنا
اللهم ارزقنا من يدعوا لنا ويترحم علينا ويستغفر لنا ويطلب لنا من الله العفو والجنه

اما بقى بالنسبه لقصيده ليس الغريب انا فعلا بحبها وبحسها فيها تذكره كبيره لكل مسلم
وحاولت تنزيل الفيديو ولكنى معرفتش
لو تعرفى تساعدينى
جزاكى الله خيرا

دنيتى الجميله يقول...

من القلب
اهلا اهلا ببلدياتلى
منوره دنيتى الجميله
ده كلام انا مقدرش عليه
شكرا على مدحك الذى اخجلنى
وفعلا انا من بنى سويف
ايه الغريب فى كده
اشتراكى معكم شىء يسعدنى جدا
ربنا يدلنا على الخير والحق
نورينى واسعدينى بزيارتك دايما

klmat يقول...

عزيزتى

ربنا يقويكى ويرحم خالتك ويكون مثواها الجنه ياارب هى وشيماء
وكل امواتنا ويهدينا جميعاونتبع
اوامره ونذكره كثيرا لتطمئن قلوبنا
حاسه بكى ان الله مع الصابرين
انا بعتذر اوى على التأخير سامحنى
ربنا يبارك فيك وفى اسرتك
سلامى

rovy يقول...

السلام عليكم ورحمة الله وبركاته
انا كمان مش عارفه ابتدى منين .. مريت بمدونتك وشدنى حزنك وماكنش ممكن امر من غير ما اقولك .. رحم الله خالتك وغفر لها واسكنها فسيح جناته والهمك الصبر والسلوان .. كما ادعو للاخت شيماء بالرحمه وحأحاول اعرف اى مدونه تقصدى .. تقبلى مرورى وعزائى
الجأى الى الرحمن بصدق وادعيه ليجعل القرأن الكريم شفاء لكى ولألامك .. صدقينى انا مريت بأصعب من احساس فقدان الخاله عندما فقدت ابى رحمه الله ولم اتخيل ان تهدأ جراحى او تنطفأ النار التى تحرقنى حزنا ولكن رحمة الله وسعت كل شىء ووجدت فى لجؤى له وقرأة القرأن الكريم ودعائى لأبى ملجأى ..
فالحمد لله انه الرحمن القريب المجيب من بيده الامر اوله واخره .. جزاك الله خيرا وتغمدنا جميعا برحمته ودمت بخير .
خالص تقديرى
تحياتى
rovy

دنيتى الجميله يقول...

klmat
اللهم امين يا اميره
دعواتك لينا كلنا
ومتأخرتيش ولا حاجه ربنا يكون فى عونك
اكيد كنتى مشغوله
بس المهم انك جيتى ونورتينى

دنيتى الجميله يقول...

rovy
وعليكم السلام ورحمه الله وبركاته
اهلا بيكى يا جميل
نورتينى واسعدنى جدا زيارتك ليا
وكلامك هدانى كتير وريحنى وخفف عنى
جزاكى الله كل الخير
نورينى دايما