عذرا رسولى الحبيب

الأربعاء، ١٦ أبريل ٢٠٠٨

لف وارجع تانى




جرب مره تفتح اجنده تليفوناتك القديمه


وتدور على نمر اصحابك القدام


اصحاب اثروا فيك وضافولك شىء جميل لحياتك


ممكن يكون صاحب مضفش اكتر من ضحكه حلوه فى وقت حزن


ممكن يكون صاحب مضفش غيرمساعده واحده لكن فى وقت شده


ممكن يكون صاحب مفيهوش حاجه غير انه حبك حب صادق من نحيته وبس


بس كان اوفى من واحد كنت انت اللى بتحبه وبس


كل الحكايه انك تضور على صديق بجد من اصحاب زمان


بس الكويسين اوعى ترجعى لصحبه ممكن تكون غيابها احسن من وجودها


وبعد كل ده اتصل بيهم فورا وقوليلى ايه انطباعك واحساسك بعد كده



قولى ومتخبيش كل اللى داربينكم


طيب هتسألونى


واصحابى اللى انا معاهم دلوقتى


هقولك


ابعتيلهم رساله حلوه على الموبايل


وعلى قد حلاوتها هتلاقى انطباعهم وصلك فى رنتهم وكلامهم بعد كده


برضوا عرفينى ايه اللى حصل


عارفه ليه كل ده


لأنى عملت كده وعشت احساس جميل جدا وارتفعت روحى المعنويه جدا


ولقيت من تانى اصحاب جداد


واكتشفت فيهم حاجات تانيه يمكن مكانتش باينه فيهم فى وقتها


بس وانتى بتعملى كده متعمليش ده وخلاص


لا حطى جواكى نيه حلوه لكده تخدى ثواب من ربنا عليها ان شاء الله


ثم تحسى انتى حلاوتها بعدين فى علاقاتك مع اصحابك


وطبعا الكلام ده من صديقه لصديقه


بلاش نعمم ونرجع مثلا صداقه بينك وبين ولد وتقوليلى حطيت نيه حلوه


هههههههههههه


جربى وانا كمان هقولك لما جربت لقيت ايه


السلام عليكم ورحمه الله وبركاته


هناك ٢٢ تعليقًا:

سكــر يقول...

والله دعوتك رائعه وجميله

انا عملت كدا فى المولد النبوى الشريف

بعت رسايل لكل اصدقائى اللى على الموبيل

كان الانطباع جميل جدا

تحياااتى

احمد سكر

A.SAMIR يقول...

موضوع جميل فعلا
بس انا للأسف معنديش نوتة تليفونات
تحياتي

صاحب المضيفة يقول...

أول تعليق


جميل قوي شعورك بأصدقائك ده


ربنا يزيدك من فضله ونعميه


ويارب كلنا ناخد بالفضائل في حياتنا ونزينها بالطاعات


دعواتك

walaa يقول...

دعوه جميله قوى اللى احنا نتصل بصحبنا ونطمن عليهم
ونرجع الصداقه ونحاول نتمسك بيها
تحياتى ولاء

آلام وآمال يقول...

انا فعلا بحب اعمل الحكاية دي دايما
دايما امسك موبايلي واشوف ارقام صحابي اللي بقالي فترة مسمعتش عنهم
بجد بحس بفرحة وشعور جميل لما الاقي الفرحة في صوتهم وانا بسلم عليهم

ربنا ما يحرمنا من الصداقة والأصدقاء ابدا

وتسلم ايدك على الدعوة الجميلة دي
:)

monaliza يقول...

فكرة حلوة طبعا بس لما بعملها مابيبقاش فيه اى رد غير بالرنات لكن الاتصال التليفونى معرفش بيعمل معاهم ايه بس بيبسطنى جدا وبيرفع روحى المعنوية
تقبلى مرورى

دنيتى الجميله يقول...

الاستاذ سكر
اهلا بحضرتك
وشكرا على الزيارة
داوم دايما على كده وربنا يدوم عليك اصدقائك

دنيتى الجميله يقول...

صاحب المضيفه
اهلا بحضرتك
يا رب
ربنا يتقبل دعواتك
ويا رب ناخد بالفضائل في حياتنا ونزينها بالطاعات
جميل لو اننا عملنا كده بجد

دنيتى الجميله يقول...

walaa
ازيك يا ولاء
يلا اتصلى بيهم وارجعى تانى هنا واكتبيلى عملتى ايه معاهم وكان رد فعلهم ايه وانطباعك واحساسك
كل حاجه يا ولاء كله كله

دنيتى الجميله يقول...

الام وامال
احساس جميل مش كده
داوم عليه كل فتره
ربنا يدوم عليك اصدقائك

دنيتى الجميله يقول...

monaliza
اهلا بيكى صديقه جديده فى دنيتى الجميله
مدونتك رائعه وجميله جدا
ان شاء الله هتابعها
وجميل جدا بوست الحب الحقيقى
اما بقى بالنسبه للاصدقاء والاتصالات
حطى نفسك مكان اللى بتبعتيله الرساله شوفى احساسك ايه وهيكون هو هو نفس احساسه بالرساله
ورنته ليكى معناها شكرا للرساله الحلوه
وهو نفسه احساسهم وانطباعهم لما بتكلميهم
بصى بقى اعملى كده لوجه الله وحاولى تحسى انها ممكن تكون صداقه واخوه فى الله وانتى هتلاقى ثمارها ونتائجها
نورينى دايما فى دنيتى

klmat يقول...

انتى انسانه جميله وتفكيرك جميل
عارفه انا فعلا بعمل كده محافظه على صديقاتى القدام جدا . وقريب
اتصلت بيا واحده ماعرفتش صوتها . عرفتنى
على نفسها .تصورى كانت معايا فى المدرسه فى ثانوى حقيقى فرحت اوى واستغربت عرفت نمره بيتى ازاى . طلعت قابلت صديقتى الانتيم فى كارفور واتبادلوا الحديث
واخذت النمره من صديقتى وطلبت منها ماتقوليش علشان تبقى مفاجأه .كانت فعلامفاجأه جميله جدا رغم ان علاقتى بها كانت سطحيه افتكرنا ايام جميله
ربنا يكرمك ويسعدك ويحقق امانيكى يارب
سلاااااااااام

ra7eel يقول...

دنيتى الجميله

اخبارك ايه يارب تكونى بالف خير دايما

عارفه انا بحس بجد ان اجمل علاقات فى حياتى علاقتى بااصحابى سواء القدام ولا علاقاتى الجديده
انا اوقات كتير بعمل الحركه دى وفعلا بكون سعيده عشان انا بكون مجربه احساس ان حد منهم يفتكرنى او يتصل او يبعت رساله بجد بفرح قوى فبحب اوصلهم برده احساسى بيهم

تحياتى وحبى لكى

همسات دافئه يقول...

شكلك بتحبى الرسايل ذيي انا كمان بحسها أكتر حاجه بتعبر عن مشاعرى
طبعا احساس رائع وانتى بتحسى ان فيه حد فاكرك والأجمل انك تفتكرى حد
على فكره مدونتك بجد جميله انا قريت كتير اوى منها وعجبتنى اوى
هتابعك على طول ان شاء الله
تحياتى:)
شيماء:)

Whispers just for a Night يقول...

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي
http://kawlansadida.blogspot.com/2008/04/blog-post_21.html
وجزاكم الله عن إسلامكم خيراً

maii bahaa يقول...

السلام عليكم

لقد تم تمرير تاج إليكي يا زهراء
ياريت تدخلي عندي تستلمي ورقة الأسئلة
تحياتي يا جميل
:)

sendbad يقول...

اول زيارة وباذن الله مش هاتكون الاخيرة
بالفعل مدونة تستحق الزيارة والاحترام
تحياتي الخالصة

نوري يقول...

البقاء لله يانونا
في خالتو فيفي
وشدي حيلك
وانشاء الله ترجعيلنا
كلنا وانتي بخير
وكلنا مستنيينك


معلش ياجماعه اعذروا نونا
اليومين دول وادعولها
وادعوا لخالتو يهون عليها
قبرها ويصبر اهلها
وانشاء الله نونا هترجع لنا
بالسلامه قريبا جدا

صالح سعيد يقول...

تصدقى فكره حلوه
بس انا جربتها مره وللاسف لقيت ناس غير الناس بيردوا عليا
لانهم غيروا ارقامهم
جيت اكلم واحد صاحبى من زمان
لقيت واحده بترد عليا
قلت يمكن اخته وطلبت منها تناديه
مطلعتش اخته وفكرتنى بعاكس
حلفتلها ان ده رقم صاحبى
قالتلى يعنى انا سرقته ولا ايه
لقيتها بتزعق
ولقيت نفسى بزعق
وبعد كده بقينا اصحاب
وصدق من قال
ما محبة الا من بعد زعيق
مش كده ولا ايه

Sampateek يقول...

انتي جميلة قوي
و كلامك كله امل


تحياتي

ست ستوته ام حكايات ملتوتة يقول...

انا جربت وجاتلى اجمل رسايل شكرا على الفكرة الجميلة وربنا يشفي مرضاكم ومرضى المسلمين

و القادم....أجمل يقول...

عسوووووووولة وسكرة كمان
فعلا بتبأه جميلة
أنا اعرف زميلاتي من ثانوي
يمكن مكنتش بكلمهم كتير
بس لما رحت الجامعه
جبت تليفوناتهم
و كل فترة لازم اطمن عليهم

ربنا يجازيكي خير

:)