عذرا رسولى الحبيب

الثلاثاء، ١٣ مايو ٢٠٠٨

عندما تدفعك الصدفه لتغير مبدئك

تحديث:
معلش يمكن هى حاجه ملهاش علاقه بالبوست
ولكنها لها نفس الدرس
موضوع ضياع الوقت فى اشياء غير مفيده وتكون الخساره كبيره
الموضوع ببساطه انى من سنه تقريبا التحقت بمدرسه لحفظ القران الكريم
وتعرفت على فتاة واحببتها جدا وسارت بيننا صداقه كبيره
ولكن للأسف تركت المدرسه بعدفتره لأنشغالى بأشياء
تافهه وهايفه ربنا يسامحنى
اللهم امين
ولكنى بعد مرور عام كامل
الحمد لله
التحقت بالمدرسه من جديد
وبدأت والحمد لله ودخلت فى الجزء التانى من سوره البقره
وفى احدى الايام تلاقيت بصديقتى القديمه وسعدت جدا برؤيتها من جديد
وأول شىء سألتها عنه انتى فى الجزء الكام؟
وسعدت جدا لما لقيتها بتقولى انا فى الجزء ال13
بسم الله ما شاء الله
ولما رجعت اعدت افكر فى نفسى واللى حاصلى
سنه كامله ضاعت من عمرى
سنه كامله ربنا رفع فيها اقوام بحفظ القران
سنه كامله ضاعت منى سبقنى فيها اقوام فى درجات الجنه
طبعا ده كله فى علم الله
ولكنى حسيت شويه بقيمة الوقت ونتيجه ضياعه
وايه ممكن نقدر نغيره ونصلحه فى نفسنا بس احنا نهتم
دى حاجه حصلت معايا وحبيت اقول لكل واحد عنده فرصه الحقها بسرعه
قبل ما تندم على ضياعها زى ما انا ندمت
نصيحه منى ليكم وليا
ارجوا ان تقبلوها
..............................
..........................
...............
....
ياااااااه الحمد لله رب العالمين..لو الواحد مننا فضل يعدد نعم ربنا هيلاقى ان اعظم نعم ربنا هى صلاه الفجر فى المسجد
الحمد لله ..اما ادخل انام علشان اعرف اصحى.

هو: خ خ خ خ خ خ خ خخخخخخخخخخخخ

الموبايل: ترن ترن ترن ترن cancel
الموبايل:ترن ترن ترن ترن.
هو: الله يا ترى مين بيرن عليا فى وقت زى ده
هو: الو.. السلام عليكم
هى: وعليكم السلام ورحمه الله وبركاته.. ايوه يا عمرو ايه يا ابنى انت نايم ولا ايه
هو: عمرو!!.. عمرو مين حضرتك
هى: مش عمرو معايا برضوا ولا احمد
هو: لا انا احمد بس حضرتك تقصدى احمد مين
هى:احمد صاحب عمرو
هو:وعمرو مين
هى:عمرو صاحب احمد
هو:لا ده انتى متصله تهرجى بقى
هى:لا انا فعلا عايزه عمرو
هو:لا يا فندم محدش هنا اسمه عمرو
هى: اووه .. انا اسفه اسفه بجد انى ازعجتك..واسفه مره كمان انى اتصلت فى وقت متأخر شويه
هو: لا هو بصراحه مش متأخر شويه يا متأخر شويات
هى: ليه هى الساعه كام دلوقتى
هو: الساعه 4 الفجر حضرتك
هى: معلش بجد مقصدش.. مع ان الدنيا صيف يعنى والكل بيسهر ولا انت من اصحاب الاعمال.
هو : لا لا اعمال ولا حاجه بس كل ما فى الامر انى بنام بدرى علشان اعرف اصحى ع الفجر
هى: ايه دا هو انت بتصلى الفجر
هو:الحمد لله
هى: معقول
هو: وايه الغريب فى كده
هى: لاة اصل انا معرفش حد بيصلى الفجر غير جدو.. غير كده معرفش
هو: ياة ليه هو انتى مبتصليش
هى:بصراحه لا.. عارف مع انى بنام كل يوم الصبح
هو: ليه بس كده
هى: شيطان بقى هنعمل ايه
هو: يلا ربنا يهديكى ويجعلك من اهله
هى: يا رب .. ايوه كده ادعيلى .. انا نفسى اكون منتظمه فى الصلاه
هو: اعرفى فضل صلاه الفجر وباقى الصلوات وانتى تنتظمى فيها
هى: طيب ممكن اطلب منك طلب
هو تفضلى
هى: ممكن تكلمنى عن فضل صلاه الفجرمين عارف مش ممكن ربنا يجعلك سبب لهدايتى
هو( يحدث نفسه): ايه يا احمد فى ايه انت هتضعف ولا ايه اثبت كده خليك راجل متخليش الشيطان يضحك عليك وبعدين ممكن تخلى اى واحده من اخواتك يتصلوا بيها ويكلموها عن الصلاه خليك انت بعيد يا عم

الشيطان اللرجيم يوسوس له قائلا:ايه يا احمد انت هتبخل بالمعلومه .. ربنا اداك شويه معلومات يا اخى ليه مش عايز تديها لغيرك
كمان ده فاضل على صلاه الفجلر نص ساعه يعنى لو قفلت معاها هتنام وممكن تروح عليك نومه يلا يا ابو حميد كلمها كلمها
هو: اوكى انا هقولك عن فضل صلاه الفجر بس انتى مأولتيش اسمك ايه
هى : انا اسمى راندا
هو: اوكى اسمعلى يا راندا بقى صلاه الفجر دى يا ستى فضلها عظيم جدا دا ربنا قال عليها (وقران الفجر ان قران الفجر كان مشهودا)

وقال صلى الله عليه وسلم (من صلى العشاء فى جماعه فكأنما قام نصف الليل ومن صلى الصبح فى جماعه فكأنما قام الليل كله)
هى: يااااه انا مش عارفه بجد اشكرك ازاى يا احمد بجد انتى عرفتنى حاجات كتير مكنتش اعرفها
ممكن لو تسمحلى اتصل بيك بكره فى نفس الوقت اعرف حاجه جديده
هو: اه طبعا اوى اوى وانا هسيب رقمك عندى مش دا رقمك برضه
هى :اه
هو: اوكى .. تسمحيلى افصل معاكى علشان الحق الصلاه فى المسجد قبل الاقامه علشان انا اول مره اتأخر كده
هى: اقامه ايه يا ابنى صباح الفل.. انت لسه فاكر دا جدو نزل صلى وجه من بدرى
ونام كمان وانت يا دوب تصلى قبل الشروق دا ان لحقت اصلا

هناك ٤١ تعليقًا:

و القادم....أجمل يقول...

اوبس
طيب دي غلطته يعني
ميمكن نيته خير
و فعلا كان عايز ميبخلش بالمعلومه
----
بس عارفه كان المفروض يقفل من الأول
دا فتح حواااااااار
و كان فعلا يخلي أي حد من البنات يكلمها

مستنين أتابع باقي الردود
:)

جزاكم الله خيرا

:)

صاحب المضيفة يقول...

ههههههههههههه


موقف وتشبيه جميل

ربنا يبارك فيك ويحفظك من كل شر وسيئة



تحياتي

رحــــيـل يقول...

هههههه
موقف فعلا حلو قوى والبيه خد مقلب تمام
طيب لو هو كان نيته خير
هى بقى كان نيتها ايه؟
وهى ياترى كانت متصله برقم غلط فعلا
ولامتصله تحكى وخلاص
اممممممم مهما كان النوايا اهى ضيعت عليه صلاه الفجر
تحياتى لكى على موضوعك الجميل جدا جدا

حمامة يقول...

هو فعلاً غلط
لانه سمع كلام الشيطان
اعتقد هى كان ممكن تسأل اى حد
وبعدين هو فى حد ميعرفش فضل صلاة الفجر
يا شيخة بنات مايصه :D
ربنا يهدى الجميع واهم حاجة صلاة الفجر
بتحسى انها بتبارك ف اليوم كله

:)

bastokka طهقانة يقول...

حوار رشيق
و الفكرة حلوة ترشق في القلب
ربنا يهدي كل الناس و يصلح حالنا جميعا

اوروفوار

Empress appy يقول...

عارفه طبعا بيحصل بس المشكله انتى دمجتى تلات حاجات الناس فعلا اللى بيتصلوا فى اوقات مش ظريفه
والناس اللى بتطلب نصيحه دى كويسه بس لما الشيطان يأخدك يبقى مشكله تانيه
وانا اعرف ناس كتير بتصحى للصبح وفعلا مش بيهون عليهم يصلوا الفجر
طيب اقولك ستات العمارة عندنا كل يوم الفجر بيدقوا على بعض بالمقشات يعنى اللى فوق تخبط على اللى تحت خبطتين تلاته ويصلوا لافجر طبعا بما انى مليش علاقه بيهم بس بسمع وبيصحونى وبيأخدوا ثواب فعلا كده

semsem يقول...

انا فى حاله ذى دى مش هرد اصلا

يعنى هيكون مين اللى عاوزنى وقت الصلا
وغالبا
متردش بعد كده فى اى وقت صلاة

وربنا يغفرلك ويعفرلنا

دنيتى الجميله يقول...

والقادم .. اجمل
فعلا الواحد ممكن تكون نيته خير ولكنه ممكن يتعامل مع ناس نيتها متكونش كده
وهى كانت كده
وبعدين هو فتح باب ومقدرش يقفله
ازاى يعنى يكلم بنت غريبه عنه ويدور بنهم حوار كبير زى كده
حاجه اساسا مش طبيعيه
احنا ممكن الشيطان يفتحلنا باب ظاهره خير ولما ندخل نلقينا ضاع مننا اشياء ثمينه زى الوقت اللى بنضيعه فى حاجات كتير كان ممكن نستفاد منها فى حاجات تانيه مفيده
وهو ضاعت منه صلاه الفجر
نورتينى واسعدنى وجودك وتعليقك جدا

دنيتى الجميله يقول...

صاحب المضيفه
اهلا بحضرتك
جزاك الله خيرا على دعائك
ادعولنا جميعا بالصحبه الصالحه

دنيتى الجميله يقول...

ra7eel
ازيك يا ساره
وحشتينى جدا
ايه يا بنتى مره بوست رومانسيه وحب ومره تانيه وهم اسمه الحب لخبطينى يا بنتى
ههههههههههههه
فعلا كلامك صحيح
هى فعلا كانت متصله بمين وليه
ربنا يحفظنا ويحفظ بناتنا يا جميل
قولى اميييييييين

دنيتى الجميله يقول...

حمامه
فعلا فعلا
بنات اخر زمن
ربنا يرحمنا ويعافينا
ويبارك فى جميع ايامنا واوقتنا

دنيتى الجميله يقول...

طهقانه
ازيك يا قمرايه
وازى طهقان بيه
وازى الشطه وعمايلها
منك نستفيد
نورتينى ونورتى دنيتى الجميله
مستنياكى على طول

tarek alghnam يقول...

السلام عليكم
اول مرة ادخل مدونتك
ماشاء الله على اسلوبك وروعتى
وفكرى البوست جميلة
ربنا يبارك فيكى
تقبلى تحياتى
واتمنى التواصل
ودمتى بحفظ الله

dodda يقول...

آآآدى عيبه!!

المهم انه زى ما نصحها يتعظ..
وبعد كده ميسبش الشيطان يضيع عليه صلاة الفجر..
ويا رب تكون هى اتعلمت اى حاجه عشان يعنى الحسنات يذهبن السيئات
ويارب كلنا نصحى لنفسنا ومتاخدناش الدنيا من اللى مطلوب مننا فعلا
"كن فى الدنيا كعابر سبيل"
وفرصه ان الواحد كمان يستغفر ويتوب

klmat يقول...

قصه جميله اوى اختيار موفق
ده اللى بيحصل لو هى نيتهاانها
تعرف فى 100 وسيله.الرد عليها لازم يكون حازم هى نيتهاواضحه
ميعاد غريب وبتفتح حديث مع واحد كتعرفهوش ربنا يهدى الجميع . تسلم ايدك وربنا يوفقك ويسعدك يارب
خالص تحياتى وحبى

rovy يقول...

جميله قوى والموعظه اللى فيها واضحه جدا .. جزاك الله خير
دمت بخير وسعاده
تحياتى
rovy

موناليزا يقول...

هو يعنى الشيطان هيغلب ده قاعد لينا بالمرصاد وبما انه مش هيقدر يخلى ناس كتير تكفر او تسجد لصنم فهو شغله دلؤتى انه يخلى الناس فى غفلة ولهو ويبعتلهم اى حاجة تشغلهم وكلها بمبرر قوى ذى ماعمل دلؤتى
اللهم انك سلطت علينا عدوا عليما بعيوبنا يرانا هو وقبيله ولا نراه اللهم أيسه منا كما أيسته من رحمتك وباعد بينه وبيننا كما باعدت بينه وبين جنتك

كلبوزة لكن سمباتيك يقول...

الله عليكي
ربنا يكرمك


تحياتي

دنيتى الجميله يقول...

appy
هههههههههههههه
حلوه اوى فكره جيرانك دى
طيب بالموبايلات وعارفنها
بالمقشات دى جديده فعلا
جزاهم الله خيرا برضوا اهم بيصحوكى
نورتينى يا appy
ونورتى دنيتى الجميله

دنيتى الجميله يقول...

semsem
اهلا بيكى يا سمسم
منوره دنيتى الجميله
وكلامك طبعا صحيح
سمسم
هو انا ممكن اقولك حاجه هو انتى بتكلمينى بصيغه المذكر ليه؟
ههههههههههه
وبعدين القصه دى انا قرأتها محصلتشى معايا
ههههههههههههههه

دنيتى الجميله يقول...

الاستاذ طارق الغنام
اهلا بحضرتك وبكل البورسعيديه
وعليكم السلام ورحمه الله وبركاته
مدونه حضرتك هى الرائعه واسلوبك ومواضيعك
جزاك الله خيرا على ما تكتبه فيها
نورت سيادتك

دنيتى الجميله يقول...

dodda
اهلا اهلا بيكى
شوفتى بقى اللى بيحصل لنا
فعلا هو ده عيبه
وبعدين تفتكرى هى قامت لحقت الفجر قبل الشروق ولا راحت نامت بعد كده
ربنا يهدى الجميع
نورتى دنيتى الجميله
ارجو دوام وتكرار الزياره

دنيتى الجميله يقول...

klmat
يااهلا بقمر المدونات
اول تعليق فى دنيتى الجميله كان من احلى اميره
وحشتينى جدا وبفرح جدا لما بلقى تعليق ليكى منور هنا
ليكى منى كل الاحترام والتقدير
نورتى دنيتى الجميله

دنيتى الجميله يقول...

rovy
كاتبه احلى البوستات
ازيك يا روفى وازى بناتك الحلوين
واضحه الموعظه وياريت كلنا نستفيد ونتعلم
تقبلى تحياتى لكل بوستاتك
نورتى دنيتى الجميله

دنيتى الجميله يقول...

monaliza
جزاكى الله خيرا على تعليقك وكلامك الصحيح جدا وموعظتك الهادفه
وانا فعلا كان نفسى احفظ الدعاء اللى انتى كتبتيه كلنا فى اشد الحاجه لحفظه واننا نقوله
"نورتى دنيتى الجميله"

دنيتى الجميله يقول...

sampateek
اهلا يا جميله
ازيك وازى كلبوز بيه
عامل ايه اليومين دول
ربنا يكون فى عونه
بيعمل رجيم جامد قوى
انا خايفه عليه
ههههههههههههههههههه
ربنا يهدينا جميعا
"نورتى دنيتى الجميله"

رحــــيـل يقول...

ربنا يثبتك يارب
ويهديكى للى فى اللى الخير

شكار على التحديث والتذكره

تحياتى لكى وحبى

Unknown يقول...

ههههههههههههههههه

لا جامدة

ودنتيتك فعلا جميلة .. جميلة اوى بذكر الله وبالروح الحلوة اللى فيها


تحياتى و جزاكم الله خيرا
:)

dodda يقول...

عن التحديث اعلق

ربنا يثبتك..ويجعل القرآن شفيعا لك

شدى حيلك

نسر الشرق يقول...

السلام عليكم

دى اول زيارة لية

هذة المدونة جميلة ودماها شربات

سلااااام

jejemam55@gmail.co يقول...

بوست جميل ماشاء الله
وفكره اروع ....ومعنى متاز

سبحان الله الشيطان مبيغلبش صحيح وبيدخل لكل واحد من مدخله
يعنى الايمان ضعيف والصلاه مش منتظمه سهل عليه يقوله ياخى كمل نومك لسه بدرى نام 10دقايق كمان ......طبعا بتوصل للشروق
وفى ناس زى اخينا ده .....بعتله اللى يلهيه لحد الشروق ....

جزاك الله خيرا اختى الجميله

إخوانى حتى النخاع يقول...

قصــــــــــــة جميلة جدااااا

فيها معانى كثيرة أوى

شكرااا ليا باشا للبوست الجميل دا



ومدونة رااائعة

أخووووك : إخوانى حتى النخاع

بنت أبيها يقول...

فعلا اصبح زمن

المتمسك بمبدأه بيقابل صعوبات

وكأنه شاذ عن مجتمعه

سعيدة اني جيت هنا

لاني بفرح كتييير لما بلاقي مدونين من محافظتي

واحب اني ادعوكي انك تدوني معانا في شخابيط سويفية

شوفي التدوينة دي كده

نداء الى كل مدون سويفي

http://tazabit.blogspot.com/2007/11/blog-post_21.html

ومنتظره ردك يا جميل

wanna b a physician يقول...

الدنيا مليانه ناس حلوه وناس وحشه
والطبيعى ان ماينفعش نتعامل بسوء نية مفترضينها احنا من البداية
لان الرسول الكريم قال انما الاعمال بالنيات ولكل امرىء ما نوى
وهو كان نيته خير
تحياتى

دنيتى الجميله يقول...

ra7eel
ازيك يا جميل
لا شكر على واجب يا قمر
ادعيلى انتى كمان وكمان
ربنا يهدينا ويثبتنا
سلام يا جميل
"نورتى دنيتى الجميله"

دنيتى الجميله يقول...

dodda
شكرا ليكى على تعليقك على التحديث
اسعدنى جدا جدا
دعواتك يا جميل
"نورتى دنيتى الجميله"

دنيتى الجميله يقول...

نسر الشرق
وعليكم السلام ورحمه الله وبركاته
جزاكم الله خيرا
اشكرك على المديح
"نورت دنيتى الجميله"

دنيتى الجميله يقول...

من القلب
يا اهلا يا اهلا
فينك من زمان
دعواتك ربنا يرضى عنا ويهدينا ويرزقنا الصحبه الصالحه
نورتى دنيتى الجميله"

دنيتى الجميله يقول...

اخوانى حتى النخاع
اهلا بحضرتك
شرفت المدونه
والحمد لله ان البوست عجب حضرتك
"نورت دنيتى الجميله"

دنيتى الجميله يقول...

بنت ابيها
يا اهلا يا اهلا يا اهلا
بنى سويف عندى كلها النهارده
انا سعيده جدا انى اتعرفت بمدونين من بنى سويف
انا اول مكتبت محافظتى فى البروفيل
حسيت ان الكل هيقول ايه منين فين دى
وتفاجأت لما لقيت اسماء كتيره لمدونين من بنى سويف
وشكرا على دعوتك
وهحاول واشوف لأنى علشان اشترك معاكم فيها لازم اقدر اقدم حاجه حلوه لمدينتى

"نورتى دنيتى الجميله"

دنيتى الجميله يقول...

طبيب بلا سماعه
عندنا
يا اهلا يا اهلا
بس انا نفسى اعرف ايه حكايه بلا سماعه دى
هههههههههههه
اما بالنسبه بالتعليق
هو فعلا نيته خير
بس الشيطان قلبها لغير كده
يعنى مش لازم يكلم بنت الساعه 4 الفجر وهى متصله تعاكس فى الوقت ده
وربنا يهدينا ويهدى جميع شباب المسلمين